Հանրագիր N 36/25
Առողջապահության նախարարություն
ՀՀ առողջապահության նախարար Անահիտ Ավանեսյան
Առողջապահություն
Պետության կողմից երաշխավորված անվճար պարտադիր կանխարգելիչ բժշկական քննությունն անցած լինելու վերաբերյալ տրամադրվող տեղեկանքի և դրա մասին կարգավորումներին հղման շտման մասին
Առաջարկվում է Պետության կողմից երաշխավորված անվճար պարտադիր կանխարգելիչ բժշկական քննությունն անցած լինելու վերաբերյալ տրամադրվող տեղեկանքի բովանդակությունը համապատասխանեցնել գործող իրավակարգավորումներին և կատարել համապատասխան փոփոխություն ՀՀ Կառավարության 2012 թվականի դեկտեմբերի 27-ի թիվ 1691-Ն որոշման, ՀՀ Կառավարության 2014 թվականի մարտի 27-ի թվագրմամբ 375-Ն որոշման և ՀՀ Առողջապահության նախարարի՝ 2015 թվականի փետրվարի 10-ի թվագրմամբ 05-Ն հրամանի մեջ։
Համաձայն ՀՀ Կառավարության 2014 թվականի մարտի 27-ի թվագրմամբ թիվ 375-Ն որոշման 2-րդ հավելվածի 4-րդ բաժնի 11-րդ կետի՝ Սոցիալական փաթեթի շահառուի կողմից կանխարգելիչ բժշկական քննություն անցած լինելու հանգամանքը հավաստվում է էլեկտրոնային առողջապահական միասնական տեղեկատվական համակարգի միջոցով կամ Հայաստանի Հանրապետության կառավարության 2012 թվականի դեկտեմբերի 27-ի N 1691-Ն որոշման N 1 հավելվածի 4-րդ կետի 5-րդ ենթակետի համաձայն տրամադրված կանխարգելիչ բժշկական քննությունն անցնելու վերաբերյալ տեղեկանքով: ՀՀ Կառավարության 2012 թվականի դեկտեմբերի 27-ի N 1691-Ն որոշման N 1 հավելվածը 4-րդ կետ չունի, փաստորեն հղումը տրված է ներկայումս գոյություն չունեցող կարգավորմանը։ Բացի դրանից նախաբանում հղում է տրված 2002 թվականի կանոնադրությանը, որը սակայն ուժը կորցրած է, և կարիք կա փոփոխելու և հղումը տալու 2018 թվականի հունիսի 11-ի թիվ 728-Լ հրամանով հաստատված կանոնադրության համապատասխան կետերին։ Նշեմ, որ քննարկվող տեղեկանքի բովանդակությունը սահմանված է ՀՀ Առողջապահության նախարարի՝ 2015 թվականի փետրվարի 10-ի թվագրմամբ 05-Ն հրամանի 2-րդ հավելվածով, ուստի վերոնշյալ կարգավորման մեջ առաջարկում եմ խմբագրել «առողջապահության նախարարի հրամանով սահմանված ձևաչափով տրված տեղեկանքով»։ Միևնույն ժամանակ Առողջապահության նախարարի նշյալ հրամանում՝ նախաբանում, հղում է տրված ՀՀ Կառավարության 2012 թվականի դեկտեմբերի 27-ի N 1691-Ն որոշման N 1 հավելվածի 4-րդ կետի 4-րդ ենթակետին, մինչդեռ ինչպես նշեցի, նման կետ նշյալ հավելվածը չունի։ Միևնույն ժամանակ Առողջապահության նախարարի նշյալ հրամանում տեղեկանքի բովանդակության մեջ նշված է, որ այն տրվում է ի հավաստումն, որ անձն անցել է ՀՀ Կառավարության 2014 թվականի մարտի 27-ի թվագրմամբ 375-Ն որոշման 5-րդ հավելվածով սահմանված պարտադիր կանխարգելիչ բժշկական քննությունն ամբողջ ծավալով, մինչդեռ ՀՀ Կառավարության նշյալ որոշումը 5-րդ հավելված չունի, իսկ այդ պարտադիր բժշկական քննությունը սահմանված է այդ որոշման 2-րդ հավելվածի 4-րդ բաժնով, ուստի անհրաժեշտ է տեղեկանքում ևս կատարել այդ բովանդակային փոփոխությունը, քանի որ ներկայումս բոլոր տեղեկանքները տրվում են նշյալ տեխնիկական անհամապատասխանությամբ։
